今日打電話比媽，知道三仔係香港時間6/20 2pm已經 put her to sleep。我無見佢好多年，記得黎到美國後第一次再堅三仔既相，佢已勁老啦，眼變得浮腫，面變得肥大，不竟佢當時已經十幾歲。記得 1987年6月13日，阿媽用一個膠袋帶米三返黎，佢當時只有大概三個月大，好瘦，黎到我地屋企好驚，阿媽放佢係我個浴缸仔，嫂嫂同我趁媽唔係屋企時放佢出黎玩，佢就里係我房門口張sofa同牆之間，因為夠黑，佢有安全感。慢慢佢開始能夠融入我地既生活，冬天佢會蜷入我床既櫃桶訓，夏天會訓阿媽坐既位，夜晚會訓係我腳中間。有好野就會擔去嫂嫂房。佢有潔癖，食完飯一定舔身，我訓係佢傍邊連我個額頭都舔埋，好舒服架。我好鐘意追佢，佢就會跑佢雪櫃頂，我成日都笑佢同阿爺好熟(阿爺幅相係雪櫃頂)。三仔企係到好斯文，好似著左韓服既少女。佢又鐘意坐係老豆既樹下，蹺埋兩隻手仔，嫂嫂成日話佢收金，我地試過擺兩個龍眼係佢對手到，佢又唔郁係甘托住對龍眼，蕹居居望住我地，笑死我地。記得佢做完絕育手術後，下身唔郁得，但仍堅持去廁所大解，佢係一隻好乖既貓。
初初到美國時，好驚米三會死。貓通常都係十二三年命，不過佢不經不覺陪左我地二十年。佢個腎已係唔好，老了連跳都跳唔起，阿媽話佢已經牛牛豆豆，我已經有心理預備，我有時唸三仔未見過軒軒，唔知軒軒見到佢會點，我會介紹三仔比軒軒知佢係一個陪我長大既朋友，不過 d 個夢唔會發生啦。我以為會無乜事，不過我既眼淚己經流左出黎，好可息我唔可以陪佢走埋最後一程，慶幸佢終於唔洗再挨苦，希望佢能夠安息。