自從做左媽咪後，我經過幾個人生交叉點。近排我又失眠，訓得著，但三四點起身，眼光光，要睇一兩個鐘電視先訓得番。爸爸話我又有心事，係啊，我有野念唔通。軒軒開始大個，有佢自己既睇法，會堅持己見，跟我駁咀。我呢，脾氣唔好，又無耐性，只要軒軒一發脾氣，我又控制唔到，發埋一份。有時睇見佢好慘，被我鬧到狗血淋頭。我知自己其實係壞榜樣，軒軒會有樣學樣。佢得個三歲人仔，又點會識控制自己。反觀我自己三十幾歲人，應該有自制能力，但偏偏又無。但我既魔鬼同我講，你係人黎架，唔通成日忍，唔好學我阿媽，你應該有自己。但我做得媽媽，應該教好軒軒，佢已經遺傳左我既臭脾氣，我再發脾氣，佢只會更差。究竟人地係點樣做個好媽媽既呢？我真係好想有人教下我。
聖誕樹砌好啦!!
星期日開始爸爸開始砌聖誕樹，令我念起之前幾個聖誕。記得第一年軒軒仲係我個肚，爸爸話要 set up 聖誕樹，阿媽同我都話唔好，因為bb出世後會無時間會收，但爸爸話要砌，因為想軒軒返到屋企睇到聖誕樹。軒軒雖然當時好細，但佢對眼仔係禁望住d閃閃既燈，當時仲未識郁手手腳腳。到左第二年，軒軒識爬啦，但佢都係得個望字。到第三年，軒軒識行啦，佢無幫手不得止，仲係到攪亂檔，我地掛，佢就’猛’，我地要等佢訓左先再砌。第二朝佢起身見到樹樹，剝大個口’ah’左一聲，佢個樣好可愛。今年佢開始識幫手啦，問爸爸佢可唔可以掛樹樹，雖然有少少攪亂檔，但都幫到忙。佢一見到樹樹，就話係’聖誕禮物’，我話係聖誕樹呀，佢話唔係，係’聖誕禮物’。今年佢不單止識講，仲識駁咀。